ന്യൂഡല്ഹി: വന്ദേമാതരം മുഴുവൻ ആലപിക്കണമെന്ന കേന്ദ്ര നിർദേശത്തെ ചോദ്യം ചെയ്ത് നൽകിയ ഹർജിയിൽ കേന്ദ്ര സർക്കാരിന്റെ പ്രതികരണം തേടി സുപ്രീംകോടതി. പ്രശസ്ത കര്ണാടിക്ക് സംഗീതജ്ഞന് ടി എം കൃഷ്ണയാണ് കോടതിയെ സമീപിച്ചത്. ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്ല്യ ബാഗ്ചി, വി മോഹന എന്നിവര് അടങ്ങുന്ന ബെഞ്ചാണ് ഹര്ജി പരിഗണിച്ചത്. ഹര്ജിക്കാരനായി മുതിര്ന്ന അഭിഭാഷകന് എസ് മുരളീധറാണ് ഹാജരായത്.
വന്ദേമാതരം ദേശീയഗീതമാണെന്നതില് ഒരു സംശയവുമില്ലെന്ന് വ്യക്തമാക്കിയ കോടതി, ഗാനം ആലപിക്കുന്നതിൽ ഒരു പൗരന്റെ മൗലീക അവകാശങ്ങളുമായി ബന്ധപ്പെട്ട് ഉണ്ടാകുന്ന നിയമപരമായ പ്രശ്നങ്ങള് പരിശോധിക്കാമെന്ന് വ്യക്തമാക്കി.
വന്ദേമാതരം മുഴുവന് പാടാന് നിര്ബന്ധിക്കുന്നത് മതേതര സ്വഭാവത്തിന് വിരുദ്ധമാണെന്നാണ് ഹർജിക്കാരന്റെ പ്രധാന വാദം. വന്ദേമാതരം ദേശീയഗാനമാക്കിയ നടപടി റദ്ദാക്കണമെന്ന ആവശ്യവും ഹർജിയിലുണ്ട്. ഭൂരിപക്ഷ മതത്തിന്റെ സന്ദേശം പ്രചരിപ്പിക്കുന്നതാണ് കേന്ദ്ര സര്ക്കാരിന്റെ നടപടിയെന്നും ഗാനത്തിലെ അവസാന നാലു ഭാഗങ്ങളില് പ്രത്യേക മതത്തിലെ ദേവതമാരോടുള്ള ഭക്തിയാണ് ഉയര്ത്തിക്കാട്ടുന്നതെന്നും ഹര്ജിയില് ടി എം കൃഷ്ണ ചൂണ്ടിക്കാട്ടിയിരുന്നു.
ഇക്കഴിഞ്ഞ ഫെബ്രുവരിയിലാണ് വന്ദേമാതരത്തിന് ദേശീയ ഗാനത്തിന് തുല്യമായ വ്യവസ്ഥകള് കേന്ദ്ര സര്ക്കാര് ഏര്പ്പെടുത്തിയത്. സര്ക്കാര് പരിപാടികളിലും സ്കൂളുകളിലും വന്ദേ മാതരം ചൊല്ലണമെന്നാണ് ആഭ്യന്തര മന്ത്രാലയം ഉത്തരവിറക്കിയത്. വന്ദേ മാതരം ചൊല്ലുമ്പോള് എല്ലാവരും എഴുന്നേറ്റുനില്ക്കണമെന്നും ഉത്തരവില് പറയുന്നുണ്ട്. സിനിമാ തിയേറ്ററുകളിലും വന്ദേ മാതരം ഉണ്ടാകണമെന്ന് ഉത്തരവിലുണ്ട്. എന്നാല് എഴുന്നേറ്റ് നില്ക്കണമെന്ന് നിര്ബന്ധമില്ല. ഇതിന് പുറമെ പത്മ അവാര്ഡുകള് പോലുള്ള പ്രധാനപ്പെട്ട പരിപാടികളിലും, രാഷ്ട്രപതി പങ്കെടുക്കുന്ന എല്ലാ പരിപാടികളും വന്ദേ മാതരം ചൊല്ലണമെന്നും ഉത്തരവില് പറയുന്നു. വന്ദേ മാതരത്തിന്റെ മുഴുവന് വരികളും ചൊല്ലണമെന്നും ഉത്തരവിലുണ്ട്. ഏതെങ്കിലും വിധത്തില് വന്ദേ മാതരത്തോട് അനാദരവ് കാട്ടിയാല് മൂന്ന് വര്ഷം തടവായിരിക്കും ശിക്ഷ.
Content Highlights: The Supreme Court sought the Centre’s response on a petition challenging a directive related to singing the full version of Vande Mataram